ការសិក្សាស្រាវជ្រាវនេះ មានគោលបំណងកំណត់បាននូវកត្តាដែលជះឥទ្ធិពលលើការសិក្សារបស់សិស្សលើមុខវិជ្ជារូបវិទ្យា។ វិធីសាស្ត្រក្នុងការស្រាវជ្រាវនេះត្រូវធ្វើឡើងតាមបែបបរិមាណវិស័យ ដែលមានសិស្សចូលរួមសរុបចំនួន 120 នាក់ នៃអនុវិទ្យាល័យអូរបែកក្អមក្នុងរាជធានីភ្នំពេញក្នុងឆ្នាំសិក្សា 2023-2024។ សម្រាប់ឧបករណ៍ក្នុងការស្រាវជ្រាវគឺជា កម្រង់សំណួរដោយវាយតម្លៃលើកត្តាធំៗចំនួនបួន គឺ 1) កត្តាគ្រួសារ 2) កត្តាខ្លួនឯង 3) កត្តាគ្រូបង្រៀន និង4) កត្តាសាលារៀន។ ទិន្នន័យដែលទទួលបានត្រូវបានវិភាគតាមកម្មវិធី SPSS។ ការស្រាវជ្រាវនេះបានរកឃើញថា កត្តាចម្បងទី1 ដែលជះឥទ្ធិពលខ្លាំងជាងគេលើមុខវិជ្ជារូបវិទ្យាលើកម្រិតថ្នាក់ទី7 គឺគ្រួសារ កត្តាទី2 គឺខ្លួនឯង កត្តាទី3 គឺគ្រូបង្រៀន និងកត្តាទី4គឺសាលារៀន។ ឆ្លងតាមរយៈការសិក្សាស្រាវជ្រាវនេះបានបញ្ជាក់ឱ្យឃើញថា ដើម្បីឱ្យសិស្សានុសិស្សទទួលបានលទ្ធផលសិក្សាល្អលើមុខវិជ្ជារូបវិទ្យា អ្នកពាក់ព័ទ្ធគួរយកចិត្តទុកដាក់លើកត្តាទាំងអស់នេះ។ ចំណែកឯគ្រួសារគួរមានតួនាទីដាស់តឿនស្មារតីកូនៗឱ្យមានការភ្ញាក់រលឹក ណែនាំកែលម្អរដល់គាត់ឱ្យយល់ច្បាស់ពីតម្លៃនៃការសិក្សារៀនសូត្រ តាមដានការសិក្សា ផ្តល់កម្លាំងចិត្ត ព្រមទាំងជួយគាំទ្រផ្នែកហិរញ្ញវត្ថុលើការសិក្សារៀនសូត្រ និងការរស់នៅផងដែរ។ មិនតែប៉ុណ្ណោះសិស្សខ្លួនឯងក៏គួរតែមានគោលដៅច្បាស់លាស់ក្នុងកាសិក្សារៀនសូត្រ ធ្វើស្វ័យសិក្សា កិច្ចការផ្ទះ រំលឹកមេរៀន គោរពច្បាប់វិន័យសាលារៀន មករៀនឱ្យបានទៀងទាត់ មានភាពក្លាហានក្នុងបញ្ចេញមតិ ហ៊ានសួរសំណួរពេលមិនយល់ជាដើម។ ម៉្យាងវិញទៀត គ្រូបង្រៀនគួរមានវិធីសាស្ត្របង្រៀន និងយុទ្ធវិធីល្អៗក្នុងការពន្យល់សិស្សឱ្យសាកសមនឹងខ្លឹមសារមេរៀន ជាពិសេសមេរៀនដែលត្រូវមានការពិសោធន៍។ រីឯសាលារៀនក៏គួរមានកន្លែងស្វ័យសិក្សា គ្រឿងបរិក្ខាបរិបូណ៍ដូចជា បណ្ណាល័យ កុំព្យូទ័រ ថ្នាក់សិក្សាដែលមិនមានសំឡេងរំខាន ។ល។ កត្តាទាំងអស់នេះនឹងជះឥទ្ធិពលលើការសិក្សារបស់សិស្សលើមុខវិជ្ជារូបវិទ្យា ដូចនេះ គ្រួសារ សិស្ស គ្រូ និងសាលារៀនគួរគប្បីមានទំនាក់ទំនងជាមួយគ្នាយ៉ាងស្អិតរមួត ដើម្បីជួយលើការសិក្សារៀនសូត្ររបស់សិស្សលើមុខវិជ្ជានេះ។